UbaT BaTu PadI

Selamat lemai,ku datai baru enggau anak runding ti nadai.Tang meh ati tu tak manchal ka natuk keyboard laptop emachines by acer tu.Kemari ku ka nulis tang meh bangat nadai ari enggau pemayuh assignment bulih seraga ti di ma ngena raga,bulih sesintung ti ditepu dalam sintung,bulih sebeledi ti tepu dalam beledi,bulih segenuk ti tepu dalam genuk,bulih seselabit ti tepu dalam selabit.Naka meh pemayuh ney?Ti ditepu meh.Nda ibuh tepu dalam ni-ni raga pan,tak gaga.Anang baka ka burung ke ngerara buah kara.Tak begendang ke diri mayuh pengawa tang enda digaga.Tang engku udah gaga ku.Ukai ngemagas ke diri tang meh nda ulih enda bagas.(ketawa kediri aku).

Ngemendar nya ku tu udah ngericau ke diri empu.Agi enda kitai Iban bisi ngembuan ubat batu padi ney?Ti sema bisi enda meh aku tu nemu.Batu selingkut nemu meh aku.Anak penemu ka nulis betajuk batu padi!Tang meh lebuh berati,nda ga salah ney,ila meh ngisi ti ti pengulu nunggu.Peeee...pama diri!Nadai deh..

Batu padi kitai kemaya ari tu nya meh pelajar sekula.Ti aki ini kitai kelia tau meh ngembuan batu padi.Kena sida bumai,ngulih ke padi.Nya laban aki ini kitai menya nadai pemandai,ukai enda pandai,tang ga nadai sekula.Sapa meh ke numbuh ke sekula kelia ingkah?Ti sama rambau bedau temu meh sapa menang sapa alah.Nadai ko enggau meh,saru meh sida ada dulu,tang ku ku enda ga ngaku rugi ada dudi.

Sapa meh kitai ke agi ka diau baruh matapanas nugal?Sapa meh kitai ke sanggup ngibun umai ari kacau jelu jegak ke jejengkak enda nudah ikak,jelu manchal enda nemu nesal?Jelu kera,jelu nyumbuh,bala sida pipit terebai dilangit.Ti nyadi petani moden ko urang enda meh ngawa.Amat a..Ukai ga mantah tauka nimbak sapa-sapa enggau leka jaku tang meh meransang diri empu.Awak ke gagit mimit ari ke udah lebuh ngenang penusah enggau pengelelak gawa dirumah,nangkal getah,belada,ke umai,ngangkut kayu.Nangkal getah ngenyauh nya ga bedarat.Nyauka sejam niki bukit,ngulu sungai.Bepansa meh enggau sida kemebai,betalat meh enggau sida manyi lalat,belaya meh enggau sida kerengit sida nyamuk.Tang paling merinsa meh laban lemetak ti ka bumai sebelah betis ngulam darah..Nya jelu ketakut nya ga rindu ke kitai..

oh..enti ulih enggai agi a..diatu bisi jalai ti ka nyamai,skula nya meh pajak ka.Arap ke bisi nasib meh ney..Ti gawa di opis enda ga kiruh nangkal,enda ibuh bumai.Bisi cina Awat nyual beras.

Kitai ke rebak baru tu meh badu agi ngasuh apai indai,aki ini kitai badu bepanas bumai,gawa nyau melinas-inas.Ngangkat ke diri sebilik awak ke bisi insur nyamai.

Enda ibuh tak kelalu nyamai asal enda merinsa.Asal meh enda ngelebu sida ti arap ke kitai ti sekula.Kasih ke sida meri belanja.Ukai nyamai ngulih ke duit..panjai ga anak runding.

Udah meh nya..bendar amat aku tu ngerichau ke diri empu.Badu aku tu..naka tu dulu..ka ngaga assignment dulu ku...mupuk dulu aku.ila betemu.Ti jaku ku bisi salah anang nyima au..aku tu manchal runding.Mayuh utai ka dipansut ka tang penemu tu bangat nadai.

daYang RaNda NgabaNg

bejalai lubah endang enda berumban,

singkang pandak sengaja ditagang,

ayun lundai baka dayang randa ngabang,

enda ibuh dudi asal ati senang,

urang ke dulu udah lama kenyang,

kitai ke dudi semina ampit tulang,,

semua ke manah udah diempu urang,

ka pan nuan agi nadai meh peluang,

o..dayang randa ngabang,

anang rindang enggai ke nuan ngining urang,

anang nitih ke pengerindu ati enggai ke nuan ngejang,

enggai ke nuan nesal lalu nyabak ngenang,

atur panjai singkang awak ke nuan menang,

enti sema nuan alah,urang ketawa magang,

ni nuan dayang randa ngabang?

mansang nuan lengkas anang muai peluang,

aram sereta kami anang pandak singkang

awak ke kitai sama ba adan pemenang.

RAUNG NGALIH

Sempama jaku raung ngalih tu ngundan reti ke pengidup kitai besari-sari.Pengidup dauka penusah tau bebali nyadi penyenang.Sempama tu enda jauh beda ari sempama jaku bekalih batang.
Buah kenang aku ke lemai tu ianya ngenang pengidup besari-sari kelebih agi nembiak tu benung besekula.Kitai empu meh nentu ke pengidup kitai baka sempama tauka enda.Tang sapa ke enggai nyamai.Taja pia jalai dipilih kitai enda sama beduduk ari buah runding ti enda sama.
oh..ni kitai ke sama rebak,aram meh sama nguji ngangkat ke diri enggau pelajar sekula.Kitai sama nemu pemerega sekula.Ni kitai ke sama anak iban aram angkat engkerawai.Baik kita ke lubah baka aku tauka jampat baka ia ke bukai.Mupuk kitai nitih ke singkang diri.Arap ke sama mujur dalam bidang diri empu.Ngalih ke batang ke repuk ngagai batang tebelian ti tan sejeman.
Kadang-kadang sendat dada ngenang pemansang dunya.Ulih ke enda kitai Iban nitih ke singkang urang.Kitai agi suntuk mukung pengidup,kitai nadai tentu pemansang,diau di entigis ulu sungai.Lebuh ke berunding asai ke repa jalai ditengah.Malik kiba,malik kanan,jalai ti repa nya udah ditebas.Udah dikupas udah beresi taja agi bisi bekau resam nyangkut kaki.Bejimat meh enggai ke resam ti kena sangkut tau ngasuh rebah,bangkai resam udah mati agi tau nelih ke kaki.
Ahh...belajar meh naka ulih.Lebu urang ke arap.Kasih apai,kasih indai,kasih aki,kasih ini.Ketup lelabi mati.Tusah,pedis,suntuk tat ke aja meh.Udah mujur sekali anang jampat tepantup ati.Gaga ati malik kanan malik kiba meda mayuh diri sebala,diri semenua,diri sebansa udah menyana.Enti urang ulih kitai pan ulih meh!Lubah tauka jampat nya belakang kira.(taja kumbai ini ku muntat)haha...ketawa ngenang.
Bah,pulai baru ngagai sempama raung ngalih tu bai ku perati ke kitai sebuat ti benung sama ngelepas ke diri ari pukung penusah.Tau ga bekalih batang tang anang ngalih ke batang tebeliah ke udah di ban urang ke dulu ngagai rangkang.Kena patis pan patah.Munyi ke nadai reti tang dalam reti nya.Lansung enda manding ngagai sapa-sapa tang lebuh kitai berati bisi kitai kadang-kadang kitai tepeda kitai sebuat,kitai semenua,kitai sebala ngalih ke batang ti meruan ngagai batang buruk,batang bubuk.Naka-naka!Ukai nambah,ukai ngulih,ukai nugung tang tak ngulam utai ke bisi.Ngerawis kediri endang enda nemu.Alah laban manuk!
Bisi balas dudi ari jangka aku sema kitai bisi pengingin ati ti keras deka ngubah jalai pengidup diri.Ni alah tak pajak dipegai urang "ulu" a...bisi maya kitai megai ulu.tuah manuh dibacha ba kaki.Tuah aku,tuah kita, sapa nemu?Atur Petara kitai enda ulih nyangka.Bisi pengingin,bisi peneka lalu bisi usaha ulih meh dudi ari raung ngalih,batang bekalih,petang diserumba terang...jangka aku meh..jangka kita?
Aku pan enda nemu.Smina nyada ke buah anak runding ke nadai penemu enggi aku.

dAra JeGit Ke diaU kaKi laNgit,dAra MeReTI TamPun pUji

Naka pemanis maya nyadi nembiak skula,ngambi penemu kena ngulih ke pengidup.Tang mayuh nembiak enda nemu reti sekula.Ba sida,nurun sekula ketegal apai indai ngasuh nurun lalu laban perintah ngukum enti ditemu enda sekula.Beduduk arinya meh penusah anak kitai iban tusah ngangkat ke diri.Bisi nya pandai tang ngayah ke pendiau diri,enggai belajar,enda bebasa ke pengajar,enda ngasi ke apai indai,lalu ngasai ke pelajar sekula nya balat ngenusah sida.

Kati ko runding kitai ke nembiak ney?Tinggal meh bansa kitai ti munyi tu.Kitai rarat nitih ke peneka ati.Nitih ke ati ti rindang nya meh kitai lubah mansang,nitih ke ati nya meh kitai tusah dudi ari...

Tang nadai nya ngawa laban diatu nembiak udah nemu reti,udah ngasai ke penusah,penyuntuk,pemedis gawa di rumah panjai ti ngasuh runding sida tekuing,tekinsit ari runding ti semina ka ngereja pengawa ti semina ngerindu ati.Amat semina tau dikumbai "tai kukut" tang arap dudi ari sida tau ngansak bala sida ke nembiak ngambi ka kitai mansang serebak ngau urang.Tang kati ko sida ti udah telanjur rarat?

Pelajar sekula oh pelajar sekula. Ngulih ke pemandai amat enda senang tang ba penemu aku pelajar sekula enda bangat tusah asal kitai sanggup tusah. Tinggi ni pan IQ ti enda diansarka belajar nadai meh guna.Baka duku tau meh tumpul!Muntat pan ti bisi inisiatif nunda ko jaku urang kemaya ari bisi meh jalai mimit.

Mayuh bendar nembiak ti pandai tang enda ulih nampung pelajar.Nama kebuah?Laban mayuh kitai sebuat rindang lalu ngasai ke diri pandai.Sinu amat ati ku ngenang. Bisi ngasuh runding ku tekerebak baka kayu melaban laban bisi sida ti tau dikumbai muntat ulih nyingkang nitih ke urang ti pandai taja singkang sida lubah tang datai meh di adan! Lebuh ke berunding,amat meh sempama ke bisi madah "angat chabi tang lia ke ubat".Dalam bendar sempama nya ba aku.Tang enda nemu meh ba rinding urang.Bisi ati cemburu mimit lebuh nerima pemutus peresa laban IQ enda setipak enggau urang.Enda nya ngawa,bendar agi ga!

Sinu ati ku ngenang ke anak kitai Iban.Nitih ke ati asai ke minta diri tau ajih ngasuh kerusi di universiti penuh laban nembiak Iban.Kasih kitai sema tinggal jauh ari bansa bukai ila.Tang bisi ga atiku tekuiang gaga laban tau dikumbai mayuh ga iban menyana..sapa ngumbai mimit? Mayuh ga a..mali kitai ngumbai bansa diri nadai menyana,smina ke enda mayuh ngumbang enggi urang.

Bah..aram meh kitai angkat engkerawai ngulih ke pemandai,enda ngira lubah ngau muntat baka aku(ko ini ku di rumah panjai madah ka aku muntat) tauka sida ke endang laju singkang..aram meh sama nuju adan "kejayaan"..

(aku nulis ukai ketegal nemu tang meri peransang ke diri empu)

enDu UmaNG DaRA teResa

dinga kitai biak bujang dara,

ku datai baru ngau pantun beleka,

nadai penemu ngerintai basa,

semina arap ke bisi rindu macha,

dinga kitai biak bujang dara,

aram kiati sama mansang sekula,

ngambi pemandai ngemansang menua,

dinga kitai biak bujang dara,

anang kitai rindang ngau arus dunya,

atur ka singkang maju semua,

ngemansang ke tanah rampa menua,

dinga kitai biak bujang dara,

anang kitai tepejuh nyadi sampah dunya,

ulah ti ngerusak anang sekali ngereja,

anang ngelebu apai indai ti melanja,

dinga kitai biak bujang dara,

atur pendiau ulah ti menyana,

udah pandai anang sumbung jai mua,

ingat ke penatai asal kitai semua,

dinga kitai biak bujang dara,

ingat ke budi diri sebala,

udah gawa menyana anang enggai meda,

kasih ke sida ti melinas-inas gawa,

dinga kitai biak bujang dara,

aram meh kitai mansang angkat sereta,

beterima kasih ngagai pengajar sekula,

nadai sida kitai ukai mensia,

dinga kitai biak bujang dara,

tetap ke ati,anang putus asa,

ketup ke ngeli ti asai pedis dikereja,

nda nya rugi,untung kitai semua,

dinga kitai biak nujang dara,

ayan ke pengelantang,pemanis mua,

tuchum selalu anang nda andal gaga,

betuah kitai neresa pemansang dunya,

dinga kitai biak bujang dara,

terima kasih ke kita pemacha,

sema jaku ku bisi salah telanjur leka,

minta ampun anang ngemana

Boy, 14, caused mosque fire

Boy, 14, caused mosque fire

KuMAng MuNsAng

dinga kitai anak sekula,

aku melandai pantun beleka,

minta dinga kitai semua,

nda ngira bujang tauka dara,

dinga kitai anak sekula,

rajin nulis sereta macha,

ngambi ka mujur pengidup menyana,

dinga kitai anak sekula,

bebasa ke pengajar,anang lawa-lawa,

pemanah ulah mesti dijaga,

nadai nya rugi, ke penguntung semua,

dinga kitai anak sekula,

berunding ke apai indai ti tusah melanja,

apai indai patut dibasa,

udah sida tuai anang nda nyaga,

dinga kitai anak sekula,

dudi ari kitai tu meh ke tulang bansa,

anang enggai ngangkat ke diri sebala,

awak ka kitai angkat sereta,

dinga kitai anak sekula,

jari ku tusun ba mua kitai sebala,

sema jaku ku tekelanjur leka,

minta ampun,anang ngemana,

dinga kitai anak sekula,

ti bisi ari ku bepantun ke kitai sebala,

naka tu dulu,nda panjai leka,

mupuk aku kumang munsang dara teresa.